हिमपातका कारण भीमदत्त राजमार्ग अवरुद्ध

धनगढी – हिमपातका कारण सुदूरपश्चिम प्रदेशका सात पहाडी जिल्ला जोड्ने भीमदत्त राजमार्ग अवरुद्ध भएको छ। बिहीबारदेखिको लगातारको बाक्लो हिमपातका कारण राजमार्ग अवरुद्ध भएको बताइएको छ।

डडेल्धुराको साहुखर्क, बैतडीको सतबाझ, खोड्पे र अछामको चौखुट्टेमा राजमार्ग अवरुद्ध भएको प्रदेश ट्राफिक प्रहरी कार्यालय अत्तरियाले जनाएको छ। त्यस्तै, बझाङ, बाजुरा, डोटी र दार्चुलामा पनि भारि वर्षाका साथै हिमपात भएको छ।

डोटीको सिलगढी तथा अछामको साफे जोड्ने पहलमानसिंह स्वाँर राजमार्ग पनि हिमपातका कारण अवरुद्ध भएको छ। उक्त राजमार्गअन्तर्गत चौखुट्टैमा बाक्लो हिमपात हुँदा बाजुरा, अछामबाट तराई जान आएका तथा तराईबाट पहाड जान हिँडेका सवारी तथा यात्रु बिच बाटोमै अलपत्र परेका छन्। वर्षा र हिमपात भएसँगै यहाँको जनजीवन प्रभावित भएको छ।
यो समाचार आजको दिनेश खबरमा छ ।