कैलालीका ९० वडामा काँग्रेसको सर्वसम्मत नेतृत्व चयन

धनगढीः कैलालीमा नेपाली काँग्रेसको वडा अधिवेशन जारी छ। जिल्ला सभापति नरनारायण शाहका अनुसार १२६ वटै वडामा आजै अधिवेशन सुरु भएकोमा अधिकांशमा सर्वसम्मत नेतृत्व चयन भएको छ।
‘९० वटा वडामा सर्वसम्मत नेतृत्व चयन भएको छ,’ शाहले दिनेशखबरलाई भने, ‘बाँकी ११ वटा वडामा सहमतिको प्रयास भइरहेको छ भने २५ वडामा चुनावी प्रक्रियाबाट नेतृत्व चयन भइरहेको छ।’ धनगढी उपमहानगरपालिकाका पनि अधिकांश वडामा सर्वसम्मत नेतृत्व चयन भएको छ। वडा नम्बर ४ लगायतका केही वडामा भने निर्वाचन भइरहेको काँग्रेस कैलालीले जनाएको छ।
कैलालीमा कार्तिक ३० गते पालिका अधिवेशन हुने छ भने मंसिर ३ गते प्रदेश निर्वाचन क्षेत्रको अधिवेशन हुने छ। मंसिर ६ गते संघीय निर्वाचन क्षेत्र अधिवेशन सम्पन्न भएपछि मंसिर १० गते जिल्ला अधिवेशन तोकिएको छ। कैलाली काँग्रेसले वर्तमान सभापतिको अध्यक्षतामा १ हजार ५ सय १ सदस्यीय जिल्ला अधिवेशन मुल व्यवस्थापन समिति गठन गरेको जनाएको छ।
दिनेशखबर