सर्वोच्च परिसरमा कानुन व्यवसायी र प्रहरीबीच घम्साघम्सी, ६ कानुन व्यवसायी घाइते

धनगढीः प्रधानन्यायाधीश चोलेन्द्रशमशेर राणाको राजीनामा माग गर्दै आन्दोलनरत कानुन व्यवसायी र प्रहरीबीच बिहीबार सर्वोच्च अदालत परिसरमा घम्साघम्सी भएको छ। घम्साघम्सीका नेपाल बार एसोसियसनका महासचिव लीलामणि पौडेलसहित ६ जना कानुन व्यवसायीहरु घाइते भएका छन्।

नेपाल बार एसोसियसनको आन्दोलनमा प्रहरीले हस्तक्षेप गरेपछि दुईपक्षबीच घम्साघम्सीसँगै हात हालाहालको स्थिति उत्पन्न भएको हो। बारले सर्वोच्च परिसरमा पोडियम राखेर विरोधसभा गर्न लागेपछि प्रहरीले हस्तक्षेप गरेको थियो। प्रहरीले जबरजस्ती पोडियम हटाएपछि कानुन व्यवसायी र प्रहरीबीच हात हालाहाल हुँदा ६ कानुन व्यवसायीहरु घाइते भएको नेपाल बारले जनाएको छ। यससँगै बारको आन्दोलनले उग्र रुप लिने देखिएको छ। बारले आज प्रधानन्यायाधीश राणाको राजीनामा माग गर्दै सर्वोच्च अदालतसहित उपत्यकाभित्रका सबै अदालत र न्यायाधिकरणमा बिहान १० देखि १२ बजेसम्म कालोपट्टि बाँधेर धर्ना दिएको थियो।

धर्नापछि सर्वोच्चमा गर्न लागिएको विरोधसभामा प्रहरीको हस्तक्षेपको बार अध्यक्ष चण्डेश्वर श्रेष्ठले विरोध एवं भर्त्सना गरेका छन्। उनले भोलिदेखि आन्दोलन थप सशक्त बनाइने जानकारी दिए।