कञ्चनपुरमा यसरी भयो सशस्त्र प्रहरीमाथि आक्रमण

धनगढी – कञ्चनपुरको दोधारा चाँदनी नगरपालिका वडा नम्बर ८ सुन्दरनगरमा सशस्त्र प्रहरी बल नेपालका जवान सुदिव सुनार ड्युटीमा तैनाथ थिए। सोमबार साँझको ८ बजिसकेको थियो।
पारी भारत बाट एक भारतीय नम्बर प्लेटको मोटरसाइकल नेपालतर्फ आइरहेको देखे सुनारले। मोटरसाइकलको पछाडि कट्टा बाधिएको थियो। जाँच गर्दा चिनी भेटियो र सुनारले नियन्त्रणमा लिए।
एक्लै देखेर केहीबेर अल्माएका ती भारतीय तस्करले आफ्नो समूह नै बोलाए। त्यसपछि जवान सुनारमाथि कुटपिट गर्न थाले। घटनापछि त्यहाँका स्थानियले सशस्त्र प्रहरीलाई साथ दिए।
तस्करबाट कुटिएका सशस्त्र प्रहरी जवान सुदिव सुनारले भने, ‘हामीहरु गस्तीको क्रममा दोधारचाँदनी नगरपालिका–८ मा थियौँ। त्यहीक्रममा एक जना भारतीय नम्बर प्लेटको मोटरसाइकलमा चिनीको बोरा लिएर आइरहेको थिए। हामीले उसलाई रोकेर सोधपुछपछि उसले ओसार पसार गरिरहेको अवैध चिनी नियन्त्रणमा लिन खोज्दा ८ र ९ जनाको समूह नै आएर कुटपिट गरे।’
सशस्त्र प्रहरीमाथि कुटपिट भएपछि स्थानीय आक्रोसित भएका छन्। ‘बर्दीमै रहेका आफ्ना जवानलाई भारतीय तस्करले कुटेर जान्छन, हाम्रो प्रशासन केही गर्दैन,’ स्थानिय बलबहादुर खड्काले भने, ‘जनताको जिउँधनको सुरक्षाको ग्यारेन्टी हुनुपर्छ।’
आठ जनाको समूहमा आएका तस्करले जवान सुनारलाई कुटपिट गरेपछि नियन्त्रणमा लिएको चिनी र मोटरसाइकल समेत लिएर गएका छन्।
यता सशस्त्र प्रहरी बल नेपाल नम्बर ३५ गण शैलेश्वरीका प्रमुख सशस्त्र प्रहरी उपरीक्षक वीरेन्द्र ऐरले घटनाको अनुसन्धान गर्ने बताए। ‘भारतीय प्रहरीले उनीहरुलाई पक्राउ गर्ने आश्वासन दिएको छ,’ उनले भने। थप छलफलका लागी टोली खटाउन लागेको जानकारी दिए। याे समाचार अाजकाे दिनेश खबरमा छ ।